فرانس میں یورو فٹبال کپ کا ناک آوٹ مرحلہ جاری ہے ، فرانس اور جرمنی نے اپنے میچ جیت کر کوارٹر فائنل کے لیے کوالیفائی کر لیا ہے ۔
اتوار کو کھیلے گئے سپر سکسٹین مرحلے کے پہلے میچ میں فرانس نے آئرلینڈ کو دو ایک سے شکست دی ۔
آئرلینڈ نے میچ کے آغاز میں پنلٹی کِک پر گول کر کے برتری حاصل کی جو پہلے ہاف کے اختتام تک برقرار رہی ۔
دوسرے ہاف میں فرانس نے اچھے کھیل کا مظاہرہ کیا اور گریز مین نے دو گول کر کے اپنی ٹیم کو میچ میں کامیابی دلا دی ۔
دوسرے میچ میں جرمنی نے شاندار کھیل پیش کیا اور تین صفر کی برتری سے میچ جیت لیا ۔
سلواکیہ کی ٹیم کسی بھی وقت جرمن دفاع کے لیے کوئی مشکل پیدا نہ کر سکی ۔
اب تک کھیلے گئے چار میچوں میں کوئی بھی ٹیم جرمنی کے خلاف گول کرنے میں کامیاب نہیں ہو سکی ۔
