امریکی فوج نے وسیع اختیارات ملنے کے بعد، افغانستان میں طالبان کے خلاف جمعے کو پہلی فضائی کارروائی کا آغاز کیا،نئے اختیارات کے تحت امریکی فوجیں باغیوں کے خلاف کارروائی کر سکتی ہیں۔
پینٹاگان کے پریس سکریٹری پیٹر کوک کے مطابق فضائی کارروائی نئے اختیارات کے مطابق ’’افغانستان کے جنوبی حصے میں‘‘ کی گئی۔
اُنھوں نے بتایا کہ ’’نشانے ٹھیک ٹھیک اہداف پر لگے‘‘۔ کوک نے کہا کہ یہ افغان افواج کی صلاحیت بڑھانے کا سبب بنے گا۔
اس سے پہلے ، امریکی کمانڈروں کو اختیار دیا گیا تھا کہ صرف زمین پر موجود امریکی افواج کے تحفظ کے لیے فضائی کارروائی کی جاسکتی ہے، جب اُنھیں طالبان کے حملے کا خطرہ ہو
افغانستان میں 9800 امریکی فوج موجود ہے۔ اوباما انتظامیہ کی پالیسی کے مطابق، اس سال کے اواخر تک یہ تعداد کم ہو کر 5500 رہ جائے گی۔
