امریکی خفیہ ایجنسی سی آئی اے کے سابق سربراہ مائیکل موریل نے کہا ہے کہ پاکستان کو امریکا کی ضرورت نہیں لیکن افغانستان میں امن کے لئے امریکا پاکستان کا محتاج ہے۔
سی این این سے گفتگو کرتے ہوئے مائیکل موریل نے کہا کہ امریکا کا پاکستان پر ناجائز دباؤ کا حربہ کارگر نہیں ہو گا البتہ اس دباؤ سے امریکا کو نقصان پہنچ سکتا ہے پاکستان کو نہیں۔
انہوں نے کہا کہ معاملہ حل کرنے کے لئے سفارتی چینل استعمال کرنے کی ضرورت ہے۔ امریکا کو افغانستان تک رسائی کے لئے پاکستان کے زمینی اور فضائی راستوں کی ضرورت ہے۔
مائیکل موریل نے کہا کہ پاکستان کی مدد اور تعاون کے بغیر امریکا افغانستان میں دہشت گردوں کے خلاف جنگ مکمل طور پر نہیں جیت سکتا۔
انہوں نے امریکی صدر ڈونلڈ ٹرمپ کو تنقید کا نشانہ بناتے ہوئے کہا کہ انہوں نے امریکی پالیسی کا اعلان کر کے امریکی کاز کو نقصان پہنچایا ہے۔