چائے والا کی پہلی میوزک ویڈیو آج ریلیز

اسلام آباد کے چائے والے کے نام سے شہرت پانے والے ارشد خان کی پہلی میوزک ویڈیو آج ریلیز ہورہی ہے۔ انہوں نے لاہور کے ریپر اسد اسحاق جو سڈ مسٹر ریپر کے نام سے مشہور ہیں، کی ویڈیو میں کام کیا ہے۔
ارشد خان، اسلام آباد کے ایک چائے خانے پر کام کرتے تھے۔ انہیں ایک مقامی فوٹوگرافر نے دریافت کیا اور ان کی تصاویر کھینچیں۔ نیلی آنکھوں اور پرکشش نقوش کی وجہ سے ارشد خان جلد ہی دنیا بھر میں مشہور ہوگئے۔ حتیٰ کہ بی بی سی اور سی این این نے بھی ارشد خان کی شہرت کے سبب انہیں خبروں کا حصہ بنایا۔
ارشد خان کی شہرت کو دیکھتے ہوئے انہیں متعدد کمرشلز اور ماڈلنگ کی پیشکش بھی کی گئیں۔ اس سلسلے کی پہلی کاوش آج سامنے آرہی ہے۔
سڈ مسٹر ریپر کی اس میوزک ویڈیو کا مرکزی خیال بھی چائے والے کے گرد ہی گھومتا ہے۔ اس ریپ سانگ کا ٹیزر گزشتہ روز جاری کیا گیا تھا جسے بے حد پسند کیا گیا ۔