ووٹوں کی دوبارہ گنتی کا حکم

امریکی ریاست وسکانسن میں الیکشن کمیشن نے ووٹوں کی دوبارہ گنتی کا حکم دیا ہے۔ دوبارہ گنتی کا عمل بھی شکست خوردہ جماعت ڈیموکریٹک پارٹی کی امیدوار ہیلری کو فائدہ نہیں پہنچا سکے گی۔
وسکانسن کے الیکشن کمیشن میں یہ درخواست گرین پارٹی کی صدارتی امیدوار جل سٹین کی جانب سے دی گئی ہے۔ یہاں ڈونلڈ ٹرمپ کو ہیلری پر معمولی سی برتری حاصل ہوئی تھی۔
ووٹوں کی گنتی کا یہ عمل انتخابی نتائج پر اثرانداز ہونے کا امکان نہیں کیونکہ وسکانسن کے دس الیکٹورل ووٹ ہیں۔
درخواست گزارجل سٹین نے کہا ہے کہ وہ ریاستوں میشیگن اور پینسلوینیا میں بھی ووٹوں کی دوبارہ گنتی کی درخواست کریں گی۔
وسکانسن کے الیکشن کمیشن نے تصدیق کی ہے کہ کمیشن کو سٹین اور ڈل لا فیونٹے کی جانب سے ووٹوں کی دوبارہ گنتی کی پٹیشنز موصول ہوئی ہیں۔
ووٹوں کی دوبارہ گنتی آئندہ ہفتے جمعے کو شروع ہو جائے گی۔ مزید کسی ریاست میں تاحال ایسی کوئی درخواست موصول نہیں ہوئی ہے اور درخواست دینے کیلئے مقررہ وقت میں سے اب تھوڑا ہی وقت باقی بچا ہے۔