سپریم کورٹ میں جمع کرائے گئے وزیراعظم کے بچوں کے جواب میں سب سے اہم دستاویز قطر کے سابق وزیراعظم حماد بن جیسم بن جبر الثانی کا خط ہے۔
اس خط کے مطابق لندن کے پارک لین میں واقع فلیٹ وزیراعظم نوازشریف کے مرحوم والد میاں محمد شریف نے خریدے تھے اور دونوں آف شور کمپنیاں بھی انہی نے قائم کی تھیں۔
حماد بن الثانی کے خط میں کہا گیا ہے کہ ان کے والد اور میاں محمد شریف کے کاروباری مراسم تھے اور انہیں بتایا گیا تھا کہ میاں شریف نے قطر میں الثانی خاندان کے ریئل اسٹیٹ کاروبار میں سرمایہ کاری کی خواہش کا اظہار کیا ہے۔
انہوں نے اپنی یادداشت کی بنا پر بتایا کہ میاں شریف مرحوم نے ان کے کاروبار میں تقریباً سوا کروڑ درہم کی سرمایہ کاری کی اور اس سے حاصل ہونے والے منافع کے ذریعے انہوں نے لندن کے پارک لین میں چار فلیٹ جن کے نمبر 17، 17 اے، 16 اور 16اے ہیں خریدے۔
حماد بن جیسم کے مطابق میاں شریف مرحوم کی خواہش تھی کہ یہ فلیٹ ان کے پوتے حسین نواز کو دیئے جائیں، ان کی وفات کے بعد دو ہزار چھ میں الثانی خاندان نے یہ فلیٹ حسین نواز کو ٹرانسفر کر دیئے۔
