اولڈ ٹریفورڈ ٹیسٹ میں انگلینڈ اور پاکستان کے کھیل میں بادل بھی اپنا کھیل کھیل رہے ہیں۔
میچ کا تیسرا دن بارش سے متاثر رہا وہیں پاکستانی ٹیم کے سر پر شکست کے بادل منڈلارہے ہیں۔
اولڈ ٹریفورڈ میں انگلینڈ نے پہلی اننگز میں 589 رنز کا پہاڑ کھڑا کیا تو پاکستانی بلے بازوں نے دل ہی چھوڑ دیا۔
حفیظ، اظہر علی اور یونس جیسے تجربہ کار بلے باز اڑتالیس رنز پر ہی پویلین لوٹ گئے۔ نائٹ واچ مین راحت علی سات گیندوں کے مہمان ثابت ہوئے۔
شان مسعود اور مصباح نے وکٹ پر رکنے کی کوشش کی، شان مسعود انتالیس اور مصباح الحق باون رنز بنا سکے۔
وہاب ریاض نے بہادری سے بیٹنگ کی لیکن ان کی بیٹنگ بھی پاکستانی ٹیم کا بیڑا پار نہ لگاسکی۔
پاکستان کی پوری ٹیم اپنی پہلی اننگز میں 198 رنز ڈھیر ہوگئی۔
انگلینڈ نے فالو آن کرانے کے بجائے اپنی دوسری اننگز شروع کرنے کا فیصلہ کیا۔ تیسرے دن کے اختتام پر میزبان ٹیم ایک وکٹ کے نقصان پر 98 رنز بناچکی ہے۔ ایلکس ہیلز 24 رنز بناکر عامر کا شکار ہوگئے ہیں۔
انگلینڈ کو پاکستان پر 489 رنز کی برتری حاصل ہے۔ آثار بتارہے ہیں کہ اگلے دو دن پاکستانی ٹیم کے لیے کافی کٹھن ثابت ہوں گے۔