لارڈز میں اپنی کامیابی سے سب کو چونکا دینے والی پاکستانی ٹیم اولڈ ٹریفورڈ میں اپنا روایتی کھیل پیش کررہی ہے۔
انگلش ٹیم کے خلاف دوسرے ٹیسٹ میں پاکستانی بولرز نے کچھ خاطر خواہ کارکردگی نہیں دکھائی۔ میزبان ٹیم نے پہلے دو دن میں جم کر بلے بازی کی اور 589 رنز کا پہاڑ کھڑا کردیا۔
ایلسٹر کک کی سنچری اور جو روٹ کی ڈبل سنچری نے بتادیا ہے کہ پاکستانی بولرز کے لیے سیریز کتنی مشکل ہونے والی ہے۔
پہلے ٹیسٹ میں پاکستان کا ٹاپ آرڈر فلاپ رہا تو دوسرے میں بھی وکٹ پر کھلاڑیوں کا رویہ کچھ بدلا نہیں۔ بلے باز آتے کیچ پکڑاتے اور پویلین واپس لوٹ جاتے۔ دوسرے دن کے اختتام تک چار کھلاڑی اپنی وکٹیں گنواچکے تھے۔
میچ کے تیسسرے دن بھی وکٹیں گرنے کا کچھ ایسا ہی سلسلہ جاری رہا۔ شان مسعود اور مصباح الحق نے وکٹ پر ٹکنے کی کوشش کی لیکن وہ بھی زیادہ دیر کامیاب نہ ہوسکے۔
بارش مدد کو نہ آئی تو اس ٹیسٹ میں پاکستان کی ہار یقینی نظر آرہی ہے۔