راولپنڈی کی احتساب عدالت نمبر ایک نے سابق صدر آصف زرداری کے خلاف اثاثہ جات کیس میں گواہی مسترد کرتے ہوئے سماعت چوبیس جون تک ملتوی کر دی۔
جج خالد محمود رانجھا نے نیب کی طرف سے سابق صدر کیخلاف سوئس زبان میں موجود دستاویزات انگریزی میں ترجمہ کرنے والے گواہ مترجم رضوان احمد کا بیان ریکارڈ کرانے کے خلاف آصف زرداری کی درخواست منظور کرلی۔
عدالت نے حکم دیا کہ مذکورہ گواہ کا بیان ریکارڈ نہیں کیا جاسکتا۔ قانون کے تحت صرف اصل دستاویزات پیش کرنے والے گواہ کا بیان ریکارڈ ہوسکتا ہے، گواہ جو دستاویزات پیش کرنا چاہتا ہے وہ فوٹوسٹیٹ ہیں۔
