ٹی او آرز کیلئے حکومت کو عید تک مہلت

چیئرمین تحریک انصاف عمران خا ن نے کہا ہے کہ پاناما لیکس کی تحقیقات کے لئے حکومت کے پاس عید تک مہلت ہے۔ کارکنوں کو احتجاج کے لیے تیار کرنا شروع کردیا ہے،تحقیقات نہ ہوئیں تو پھر سڑکوں پر ہوں گے۔
دنیا نیوز کے پروگرام دنیا کامران خان کے ساتھ گفتگو کرتے ہوئے عمران خان نے کہا کہ جب تک وزیراعظم کا احتساب نہیں ہوگا کرپشن ختم نہیں ہوگی۔
ٹی او آرز میں سے وزیراعظم کا نام نکالنا ہے تو پھراحتساب کا کیا فائدہ؟ وزیراعظم نے غلط کام نہیں کیا تو خوف کس چیز کا ہے؟۔ جن ٹی او آرز سے وزیراعظم کا احتساب ہونا ہے انہیں سے میرا بھی احتساب کرلیں۔
انہوں نے کہا کہ انتخابی اصلاحات ہو جائیں تو الیکشن کا عمل بہتر ہوسکتا ہے لیکن دھاندلی کرنے والوں کو سزائیں ملنے تک نظام ٹھیک نہیں ہوگا۔
الیکشن کمیشن نے نوازلیگ کے ساتھ مل کرمیچ فکس کیا تھا،جب تک کسی کوسزا نہیں ہوگی اسی طرح قانون توڑیں گے۔