تحریک انصاف کے حکومت کے خلاف رائے ونڈ مارچ کے لئے قافلے پہنچنے کا سلسلہ جاری ہے، جو کارکن پہلے سے رائے ونڈ پہنچ چکے ہیں انہوں نے وہاں پڑاؤ ڈال لیا ہے جب کہ خواتین کے ٹھہرنے کے لئے الگ سے انتظام کیا گیا ہے۔
عمران خان نے اعلان کیا ہے کہ وہ جمعہ کی نماز اڈا پلاٹ پر ادا کریں گے۔ وہ لاہور میں زمان پارک سے قافلے کی صورت میں رائے ونڈ پہنچیں گے۔ ملک کے مختلف شہروں کی طرف سے قافلوں کی آمد جاری ہے۔ بنوں سے خیبر پختون خوا کے وزیر اعلیٰ پرویز خٹک ایک بڑے قافلے کی قیادت کرتے ہوئے لاہور پہنچیں گے، کراچی سے عارف علوی اورعمران اسماعیل قافلے لے کر پہنچیں گے جب کہ اسلام آباد سے اسد عمر بھی روانہ ہو چکے ہیں۔
اڈا پلاٹ پر ایک سے ڈیرھ لاکھ لوگوں کی گنجاش ہے تاہم تحریک انصاف کا دعویٰ ہے کہ وہاں 5 لاکھ سے زائد لوگ اکٹھا کر کے دکھائیں گے۔ اڈا پلاٹ پر جلسے کے لئے کنٹینرز لگا کر بڑا اسٹیج تیار کیا جا رہا ہے۔