شین وارن میدان میں ہوں یا میدان سے باہر ہمیشہ خبروں میں رہتے ہیں۔
اس بار آسٹریلوی سپنر نے چینل نائن کی وکٹ اُڑانے کے لیے قانونی چارہ جوئی کی دھمکی دی ہے۔
شین وارن نے امریکی اداکارہ ایملی رتائے کوسکی کی ایک تصویر پر کمنٹ کیا تھا جس پر چینل نائن کے پروگرام میں انہیں ”گھٹیا” کہا گیا۔
شین وارن نے ٹویٹر پر اپنا فوری ردعمل دیا اور چینل کے خلاف قانونی کارروائی کرنے کی دھمکی دی۔
”میں 23 سال سے چینل نائن کے ساتھ ہوں اور کئی بار اپنے معمول سے ہٹ کر بھی ٹوڈے شو کے لیے وقت نکالا، تاہم اب ایسا نہیں ہوگا، اب میرے خیال میں وکیل کے لیے وقت نکالنا ہوگا۔”
اس لڑائی میں شین وارن کے دوست بھی کود پڑے جس میں ان کی پُرانی محبوبہ الزبتھ ہرلے بھی شامل ہیں۔
الزبتھ ہرلے نے وارن کو ”گھٹیا” کہنے کو نہایت افسوسناک قرار دیتے ہوئے کہا کہ چینل نائن نے کمینگی کا مظاہرہ کیا۔
شین وارن اور ان کے دوستوں کی جانب سے شدید ردعمل سامنے آنے پر ٹوڈے شو نے پروگرام کے متنازع حصے سے متعلق ٹویٹ کو ڈیلیٹ کردیا ہے۔