پاکستان کے سرکاری اداروں اور بالخصوص سرکاری تعلیمی اداروں میں خواتین کو ہراساں کرنے کے واقعات میں اضافہ ہو رہا ہے، شکایات پر خاتون محتسب نے کمیٹی بنا کر تحقیقات کا حکم دے دیا ہے۔
خواتین کے تحفظ کے لئے قوانین کے باوجود ہراساں کرنے کے واقعات میں اضافہ ہو رہا ہے۔ خاتون محتسب کو سرکاری اسکولوں کی کئی خواتین اساتذہ کی طرف سے شکایات موصول ہوئیں کہ محکمہ ایجوکیشن کے افسران پوسٹنگز اور چھٹیوں کے معاملے پر ناجائز مطالبات کرتے ہیں، بعض اساتذہ کی طرف سے محتسب کو ثبوت بھی فراہم کئے گئے ہیں۔
محتسب نے محکمہ ایجوکیشن کو فوری طور پر تحقیقات کا حکم دیا ہے اور اس سلسلے میں کمیٹی قائم کر دی ہے۔ سیکرٹری اسکول نے سرکاری تعلیمی اداروں کے ہیڈ ماسٹر صاحبان کو کوڈ آف کنڈکٹ پر سختی سے عملدرآمد کرنے اور محکمہ ایجوکیشن کے افسران کو بھی فوری ایکشن کی ہدایت کی ہے۔