پاناما تحقیقات، درخواستیں سماعت کے لئے منظور

سپریم کورٹ نے پاناما لیکس کی تحقیقات کے لئے پی ٹی آئی کی طرف سے دائر درخواستیں سمات کے لئے منظور کر لی ہیں، سپریم کورٹ رجسٹرار نے پہلے ان درخواستوں پر اعتراض لگا کر واپس کر دیا تھا، سپریم کورٹ نے اعتراض ختم کرتے ہوئے سماعت شروع کرنے کا فیصلہ کر لیا۔
چیف جسٹس پاکستان جسٹس انور ظہیر جمالی کی سربراہی میں بنچ نے پاناما لیکس کی تحقیقات کے لیے دائر درخواستوں پر رجسٹرار کے اعتراضات سے متعلق سماعت کی۔ چیف جسٹس نے فریقین کے وکلا کے دلائل سننے کے بعد تحریک انصاف سمیت دیگر 4 درخواستوں پر رجسٹرار کی جانب سے لگائے گئے اعتراضات کو ختم کرتے ہوئے درخواستوں کی سماعت کھلی عدالت میں لگانے اور درخواستوں کو سماعت کے لیے مقرر کرنے کا حکم دیا۔ ان درخواستوں کی سماعت 3 رکنی بینچ کرے گا۔ جماعت اسلامی اور تحریک انصاف سمیت 4 جماعتوں نے پاناما لیکس کی تحقیقات کے لیے سپریم کورٹ میں آئینی درخواست دائر کی تھی جس پر رجسٹرار آفس سپریم کورٹ نے اعتراضات لگا کر واپس کردی تھی تاہم بعد میں تحریک انصاف نے درخواست پر رجسٹرار کے اعتراضات کے خلاف سپریم کورٹ میں اپیل دائر کردی تھی۔