آزاد کشمیر، دریا میں گرنے والی بس کے20مسافر لاپتہ

آزاد کشمیر میں گزشتہ روز دریا میں گرنے والی بس کے 20 مسافر تاحال لاپتہ ہیں۔ رات کے وقت مسافر بس نیلم سے نوسیری کی طرف جا رہی تھی جب وہ نیلم جہلم ہائیڈرو پراجیکٹ کے ڈیم کے قریب دریا میں جا گری، بس میں 30 سے زائد مسافر سوار تھے جن میں سے صرف 3 مسافروں کو زخمی حالت میں دریا سے نکالا جا سکا۔ 2 خواتین سمیت 5 افراد کی لاشیں نکال لی گئیں جب کہ 15 سے 20 مسافر تاحال لاپتہ ہیں۔
واقعہ جمعہ کی شام کو پیش آیا تھا تاہم اندھیرے کے باعث امدادی کارروائیاں روک دی گئیں تھی۔ آج سے امدادی کارروائیوں کا سلسلہ پھر سے شروع کر دیا گیا ہے۔ فوج کے جوان بھی لاپتہ افراد کی تلاش میں مصروف ہیں۔ ماہر غوطہ خوروں کی مدد بھی لی جا رہی ہے تا کہ دریا میں ڈوبنے والوں کی تلاش کی جا سکے۔