مہمند ایجنسی کی تحصیل انبار کے دور دراز علاقے بٹہ مینا کی مسجد میں نماز جمعہ کے دوران خود کش حملہ ہوا۔ اس علاقے میں کالعدم تنظیم حرکت النصار کافی عرصے سے موجود ہے۔ دھماکے کے وقت مسجد میں سینکڑوں کی تعداد میں نمازی موجود تھے۔
دھماکا اتنا شدید تھا کہ 23نمازی شہید ہو گئے جبکہ 25 سے زائد زخمی ہوئے۔ واقعہ کی اطلاع ملتے ہی سیکیورٹی فورسز اور پولٹیکل انتظامیہ کے اہلکار بٹہ مینا پہنچ گئے۔
زخمیوں کو باجوڑ ایجنسی سمیت دیگر قریبی علاقوں کے ہسپتالوں میں منتقل کیا گیا ہے جہاں انہیں ہر ممکنہ طبی امداد دینے کی کوشش کی جا رہی ہے۔
دور دراز علاقہ ہونے اور مواصلاتی رابطے میں مشکلات کے باعث امدادی کارروائیوں میں شدید مشکلات کا سامنا رہا اور لوگ اپنی مدد آپ کے تحت کارروائی کرتے رہے۔
پولٹیکل انتظامیہ کے مطابق دھماکا خود کش حملہ آور نے کیا جبکہ سیکیورٹی فورسز تحقیقات میں مصروف ہیں۔
