سندھ ہائی کورٹ نے فلم ”مالک” کی نمائش پر پابندی ختم کردی ہے اور ملک بھر میں نمائش کرنے کے احکامات جاری کردیئے ہیں۔
عاشر عظیم کی فلم میں سیاستدانوں کی کرپشن کو موضوع بنایا گیا ہے۔
وفاقی حکومت نے فلم کی تین ہفتے نمائش کے بعد 8 اپریل کو اس پر پابندی عائد کردی تھی۔
چیئرمین سنسر بورڈ کے مطابق فلم نے یہ تاثر دیا کہ ملک میں کوئی قانون نہیں، شہریوں کو لاقانونیت پر اکسایا گیا، سیاست دانوں کی شخصیت کو منفی انداز میں پیش کیا گیا۔
فلم کے مصنف اور ہدایتکار عاشر عظیم کا کہنا تھا فلم کے ذریعے عوام کو پیغام دیا گیا ہے کہ جمہوریت کا مطلب صرف ووٹ کاسٹ کرنا نہیں۔ ہرروز اپنے حقوق ادا کرنا اور ذمہ داریاں نبھانا بھی ہے۔
سندھ ہائی کورٹ میں دائر ہونے والی درخواست میں موقف اختیار کیا گیا تھا کہ فلم پر پابندی وفاقی حکومت نے لگائی ہے جس کا اختیار وفاق کے پاس نہیں۔
