کالعدم تحریک طالبان پاکستان نے اپنے ایک بیان میں بتایا ہے کہ ان کا اہم کمانڈر روید علی شیخ مارا گیا۔ دہشت گرد تنظیم کے مطابق 4ستمبر کو پاکستانی سیکیورٹی فورسز پر روید علی شیخ حملے کی منصوبہ بند کر رہا تھا۔
منصوبہ بندی میں کمانڈر موسیٰ سمیت 10مزید دہشت گرد بھی موجود تھے ۔ یہ اجلاس مبینہ طور پر کرم ایجنسی کے پاک افغان سرحد ی علاقے گیان رازو میں جاری تھا کہ مبینہ ڈرون حملہ کیا گیا جس میں تمام افراد ہلاک ہوئے۔
تاہم اب تک یہ واضح نہیں ہوا کہ مبینہ ڈرون حملہ پاکستان نے کیا یا پھرغیر ملکی افواج کی جانب سے حملہ کیا گیا تھا۔ پاکستانی سیکیورٹی فورسز نے اس حوالے سے اب تک کوئی تفصیل جاری نہیں کی۔ تاہم ضرب عضب کی ابتدا کے بعد سے پاکستان میں امریکی ڈرون حملے بند ہو چکے ہیں۔
پاکستانی فورسز کی جانب سے حملوں میں ایف 16 سمیت مختلف طیارے اور براق نامی پاکستانی ڈرون بھی استعمال کیا جاتا ہے۔
