چین نے انڈیا کی جانب سے چین سے ملحق متنازع سرحد پر جدید کروز میزائل نصب کرنے کے ردعمل میں کہا ہے کہ وہ امید کرتے ہیں کہ انڈیا علاقائی امن اور استحکام کی کوششوں پر توجہ دے گا نہ کہ اس کے برعکس۔
انڈین فوجی حکام کا کہنا ہے کہ ان کا چینی سرحد پر فوجی دستوں کو روس کی اشتراک سے تیار کردہ براہموس میزائل سے مسلح کرنے کا منصوبہ ہے۔ یہ اقدام فوجی اور سویلین انفراسٹرکچر کی صلاحیتوں کو بڑھانے کی جاری کوششوں کا حصہ ہے۔
دونوں ممالک کے سربرہان نے گذشتہ سال سرحدی کشیدگی کو کم کرنے کی کوششیں کی تھیں لیکن یہ تنازع تاحال حل طلب ہے۔
چین ہمالیہ کے مشرقی سیکٹر میں نئی دہلی کے زیرانتظام 90 ہزار مربع کلومیٹر پر اپنا دعویٰ کرتا ہے جبکہ انڈیا کا کہنا ہے کہ مغرب میں چین نے انڈیا کے 38 ہزار مربع کلومیٹر پر مشتمل اکسائی چن کے علاقے پر قبضہ کر رکھا ہے۔
انڈین وزیراعظم نریندر مودی آئندہ ماہ چین میں جی 20 سربراہی اجلاس میں شرکت کے لیے جائیں گے جہاں ان کی چینی صدر شی جن پنگ سے ملاقات متوقع ہے۔
