اٹلی کے وسطی علاقوں میں شدید زلزلے سے 120 افراد ہلاک اور سیکڑوں زخمی ہوگئے، درجنوں مکانات ملبے کا ڈھیر بن گئے، امدادی سرگرمیاں جاری ہیں، ہلاکتوں میں مزید اضافے کا خدشہ ظاہر کیا جارہا ہے۔
اطالوی میڈیا کے مطابق امریکی جیولوجیکل سروے نے کہا ہے کہ ریکٹر اسکیل پر زلزلے کی شدت 6.2 ریکارڈ گئی، جس کا مرکز ’’پیراگیا‘‘ شہر کے جنوبی مشرق میں 76 کلومیٹر کے فاصلے پر زمین کی 10 کلو میٹر گہرائی میں تھا۔
غیر ملکی میڈیا کے مطابق زلزلے سے درجنوں عمارتیں منہدم ہوگئیں، اطالوی حکام کا کہنا ہے کہ متعدد لوگ منہدم عمارتوں کے ملبے تلے دبے ہوئے ہیں جنہیں نکالنے کیلئے امدادی کام جاری ہیں۔
ایک مقامی اخبار کے مطابق روم میں عمارتیں 20 سیکنڈ تک لرزتی رہیں، اماٹریس نامی قصبے کے میئر نے میڈیا کو بتایا کہ قصبہ بری طرح متاثر ہوا ہے، سڑکیں بند ہو گئی ہیں، کئی لوگ عمارتوں کے ملبے تلے دبے ہیں، لینڈ سلائیڈنگ بھی ہوئی جبکہ پل گرنے کی بھی اطلاعات ہیں۔
اٹلی کے شہری دفاع کے ادارے نے اس زلزلے کو شدید ترین قرار دیا ہے، حکام نے مرنے والوں کی تعداد میں مزید اضافے کا خدشہ ظاہر کیا ہے
