آسٹریلیا کے گلین مگ گراتھ بھارتی باولرز کی کوچنگ کے لئے مختلف شہروں کے دورے کر رہے ہیں۔
چنائی میں میڈیا سے گفتگو میں ان کا کہنا تھا کہ دنیا بھر میں فاسٹ باؤلر تیزی سے تباہ ہو رہے ہیں۔
بیگ باش اور آئی پی ایل ٹورنامنٹ کھیل کر کھلاڑی راتوں رات کروڑ پتی ہو جاتے ہیں۔
پھر وہ محنت کرنا چھوڑ دیتے ہیں۔
انہوں نے کہا کہ نوجوان فاسٹ باولرز کی اب ذہنی تربیت کی ضرورت ہے تاکہ وہ اس سب کو ہضم کر سکیں۔ ایک لمبے کیئرئیر کے لئے محنت انتہائی ضروری ہے۔
اگر آپ ایسا نہیں کرتے تو جلد ہی بطور باولر ختم ہو جائیں گے۔ انہوں نے کہا کہ وہ کئی باولرز کے نام لے سکتے ہیں لیکن یہ مناسب نہیں۔ بہتر ہے کھلاڑی خود اپنے ارگرد غور کریں۔
میگراتھ نے کہا کہ پیسہ ہمیشہ ثانوی ہونا چاہیے، کرکٹ میں پیسہ اہم نہیں ہوتا۔ سب سے اہم کھیل ہے۔ اگر کھیل سے محبت ہے تو پھر پیسہ ہمیشہ دوسرے نمبر پر رکھو۔ صرف اسی طرح کوئی بھی شخص عظیم کھلاڑی بن سکتا ہے۔
انہوں نے کہا کہ وہ بہت خوش ہیں کہ کھلاڑی آج اچھا پیسہ کما رہے ہیں۔
