اقوام متحدہ نے مسئلہ کشمیر کے حل کے لیے کردار ادا کرنے پر آمادگی ظاہر کر دی۔ بانکی مون نے وزیرِ اعظم نواز شریف کی جانب سے مقبوضہ کشمیر کے حالات کا نوٹس لینے کیلئے لکھے گئے خط کا جواب دے دیا۔ اقوام متحدہ کے جنرل سیکرٹری بانکی مون نے کہا ہے کہ اقوام متحدہ مسئلہ کشمیر کو حل کرنے کیلئے خدمات فراہم کرنے کو تیار ہے۔
وزیرا عظم کی جانب سے لکھے گئے خط کے جواب میں بانکی مون نے کہا ہے کہ مقبوضہ کشمیر میں تشدد روکنے کے لیے کوششیں کی جائیں گی۔ مسئلہ کشمیر کا پر امن حل علاقائی امن اور استحکام کیلئے ناگزیر ہے۔ کشمیر سمیت تمام مسائل مذاکرات سے ہی حل ہو سکتے ہیں۔
اقوام متحدہ کے سیکرٹری جنرل نے مقبوضہ کشمیر میں مظاہرین کی ہلاکتوں کی شدید مذمت کی۔
بانکی مون کا مزید کہنا تھا کہ پاکستان کی جانب سے علاقائی امن اور مسئلہ کشمیر پر امن طریقے سے حل کرنے کیلئے کوششیں قابل تعریف ہیں۔ وہ اقوام متحدہ اجلاس میں وزیر اعظم نواز شریف سے ملاقات کے منتظر ہیں۔
