اوول میں بالآخر پاکستان نے انگلینڈ کو شکست دے کر سیریز برابر کر لی۔میچ پر مجموعی طور پر پاکستانی باؤلرز حاوی رہے۔ پہلی اننگز میں سہیل خان اور دوسری میں یاسر شاہ نے انگلینڈ کی بلے بازوں کی ایک نہ چلنے دی۔
اوول ٹیسٹ کے آغاز میں انگلینڈ نے پہلے بیٹنگ کرتے ہوئے پہلی اننگز میں 328 رنز اسکور کئے تھے۔ جواب میں پاکستان نے اپنی پہلی اننگز میں 542 رنز بنائے۔ اس اننگز میں اسد شفیق اور یونس خان نے شاندر بلے بازی کر کے پاکستانی کی جیت کو یقینی بنایا۔
انگلینڈ کے بلے باز دوسری اننگز میں رنز کا پہاڑ سر کرنے کیلئے میدان میں اترے تو آغاز میں ہی ان کی 4 وکٹیں گر گئیں۔شروع ہی میں یوں لگنے لگا کہ وہ پاکستان کو کوئی بڑا ہدف دینے کی کوشش میں کامیاب نہ ہو سکیں گے کیونکہ ان کا کوئی بھی کھلاڑی وکٹ پر ٹھہر نہ سکا ۔
وہ ایک ایک کرکے تیزی سے آؤٹ ہوتے چلے گئے۔ انگلینڈ کی طرف سے سب سے زیادہ اسکور بیئر سٹرا نے 81 رنز بنائے جبکہ جو روٹ39اور معین علی 32رنز بنا کر نمایاں رہے۔
دوسری اننگز میں پاکستان کی جانب سے یاسر شاہ نے 5 وکٹیں حاصل کیں اور وہاب ریاض نے 2وکٹیں حاصل کیں۔
انگلینڈ کی پوری ٹیم دوسری اننگز میں 253 رنز بنا کر پویلین لوٹ گئی ہے۔پاکستان نے 40 رنز کا ہدف باآسانی حاصل کر لیا۔
پہلی اننگز میں سہیل خان اور دوسری اننگز میں یاسر شاہ نے 5,5وکٹیں حاصل کیں۔
تاہم اوول میں یونس خان اور اسد شفیق کی پہلی اننگز میں شاندار بیٹنگ نے ہی پاکستان کی جیت میں کلیدی کردار ادا کیا۔
یونس خان پر میچ سے پہلے شدید تنقید کی جا رہی تھی لیکن انہوں نے شاندار کم بیک کر کے ناقدین کو چپ کرا دیا۔ ان کی اوول میں بیٹنگ کیرئیر کی بہترین اننگز میں شامل ہے۔
