اوول ٹیسٹ کا پہلا دن انگلینڈ کے نام رہا تو دوسرے دن پاکستان نے بھرپور جواب دیا۔ اس میچ میں بلے بازوں نے بولرز کی محنت پر پانی نہیں پھیرا۔ دن کے اختتام پر پاکستان کو انگلینڈ پر 12 رنز کی برتری حاصل ہے۔ یونس خان اور سرفراز احمد تیسرے دن کھیل کا آغاز کریں گے۔ پاکستان کی چار وکٹیں باقی ہیں۔
اسد شفیق نے دو چھکوں اور بارہ چوکوں کے ساتھ 109 رنز کی شاندار اننگز کھیلی۔ یونس خان نے اوول کے گراؤنڈ میں اپنے کیرئیر کی بتیس ویں سنچری سکور کی۔
پاکستان نے ایک وکٹ کے نقصان پر تین رنز سے دوسرے دن کا کھیل شروع کیا۔ اظہر علی کے ساتھ یاسر شاہ نے انگلش بولرز کو خاصا پریشان کیا۔ 52 کے سکور پر پاکستان کی دوسرے آؤٹ ہونے والے کھلاڑی یاسر شاہ تھے جنہوں نے 26 رنز سکور کئے۔
اظہر علی صرف ایک رن سے نصف سنچری مکمل نہ کرسکے۔ معین علی کی گیند پر بیئرسٹو نے ان کا کیچ لیا۔ اس طرح 127 کے مجموعی سکور پر پاکستان تین وکٹیں کھوچکا تھا۔
اسد شفیق اور یونس خان انگلش بولرز کے لیے لوہے کا چنا ثابت ہوئے۔ دونوں کے درمیان 150 رنز کی اہم پارٹنر شپ سے پاکستان نے میچ میں واپسی کی۔ اسد شفیق سٹیون فن کی گیند پر پُل شاٹ کھیلتے ہوئے براڈ کو کیچ تھما بیٹھے۔ یوں 109 رنز پر ان کی اننگز کا خاتمہ ہوا۔
کپتان مصباح الحق وکٹ پر زیادہ دیر جم کر یونس خان کا ساتھ نہ دے پائے۔ ووکس کی انتہائی شاندار گیند پر ہیلز نے ان کا کیچ لیا۔ مصباح صرف 15 رنز بناسکے۔
ٹیسٹ ڈیبیو کرنے والے افتخار احمد نے چار گیندوں کا سامنا کیا، ایک چوکا لگایا اور ووکس کے اسی اوور میں وکٹ گنوادی۔ آف سٹمپ سے باہر جاتی گیند کو پُل کرنے کی غلطی نے انہیں واپس پویلین پہنچایا۔
اس کے بعد سرفراز احمد بیٹنگ کے لیے آئے جو دن کے اختتام تک یونس خان کے ساتھ وکٹ پر موجود رہے۔ یونس 101 اور سرفراز 17 رنز کے ساتھ ناٹ آؤٹ ہیں۔
انگلینڈ کی طرف سے ووکس اور فن نے دو دو کھلاڑیوں کو آؤٹ کیا۔ براڈ اور معین کو ایک ایک وکٹ ملی۔