تحریک انصاف کے رہنما شاہ محمود قریشی نے میڈیا سے گفتگو کرتے ہوئے کہا ٹی او آرز پر حکومت بات کرنا چاہتی ہے تو تیار ہیں ورنہ مزید نشستیں بے معنی ہوں گی۔ کل پروگرام کے مطابق ریلی نکالی جائے گی۔
انہوں نے کہا پی ٹی آئی نے آرٹیکل 62، 63 پر ایک ریفرنس تیار کر لیا ہے۔ پندرہ اگست کو اسپیکر آفس میں جمع کرایا جائے گا۔ کرپشن اور پاناما کے مسئلے پر ہم اپوزیشن پارٹیز کے ساتھ ہیں۔ اپوزیشن پارٹیاں اگر ساتھ دیں تو طاقت میں اضافہ ہو گا۔ اپوزیشن جماعتوں سے درخواست ہے کہ وہ بھی احتجاج میں اپنا حصہ ملائیں صرف بیانات تک نہ رہیں۔
شاہ محمود قریشی کا کہنا تھا کہ حکومت نے نیشنل ایکشن پلان پر عمل کیا ہوتا تو آج سانحہ کوئٹہ نہ ہوتا۔ کبھی بھی اپوزیشن رہنماؤں کو کسی سیکورٹی اجلاس میں نہیں بلایا گیا۔ آخر کس بات کی پردا داری ہے۔ اگر سب کی رائے لی جائے تو بہتر انداز میں پالیسی بنائی جا سکتی ہے۔
