پاکستان عوامی تحریک کے سربراہ ڈاکٹر طاہر القادری نے پنجاب میں ضرب عضب شروع کرنے کا مطالبہ کیا ہے۔
انہوں نے 16 اگست کو ہونے والا احتجاج موخر کردیا ہے۔ اب عوامی تحریک 20 اگست کو احتجاج کرے گی۔
لاہور میں پریس کانفرنس کرتے ہوئے طاہر القادری کا کہنا تھا کہ سانحہ کوئٹہ پر دل خون کے آنسو رو رہا ہے۔ نیشنل ایکشن پلان کے تمام نکات پر عملدرآمد نہ ہونے کی وجہ سے آج ایک کے بعد ایک سانحہ رونما ہورہا ہے۔ فوج نے اپنا کام کیا مگر دیگر سیاسی اورقانون نافذ کرنے والے اداروں نے اپنا کام نہیں کیا۔
ڈاکٹر طاہر القادری نے کہا کہ 17 ماہ گزر گئے ہمیں بتایا جائے نیشنل ایکشن پلان پر وزیر اعظم نے کتنے اجلاس بلائے؟ کیا غیر ملکی فنڈنگ رُکی یا نہیں؟ نام بدل کر کام کرنے والوں کے خلاف کیوں کارروائی نہیں کی گئی۔
انہوں نے کہا کہ بلوچستان میں غیر ملکی فنڈنگ سے اقتصادی راہداری پر مدرسے بن رہے ہیں مگر حکومت ان کے مقاصد سے نابلد نظر آرہی ہے۔