امریکی جاسوس میتھیو کریگ بیریٹ کو بھیس بدل کر دوبارہ پاکستان میں داخلے پر دھرلیا گیا۔ بلیک لسٹ امریکی شہری کے پاکستان آنے پر ایف آئی اے حرکت میں آ گئی۔
ایف آئی اے کے مطابق امریکن باشندہ میتھیو کریگ بیریٹ لینڈنگ کارڈ پر غلط کوائف درج کرکے پاکستان میں داخل ہوا جس پرایف آئی اے اسلام آباد نے فوری کارروائی کرکے اسے گرفتار کرلیا۔ ایف آئی اے نے امریکی شہری کو گرفتاری کے بعد امیگریشن سیل منتقل کردیا ہے۔
میتھیو کو ائرپورٹ سے کلیئر کرنے والے ایف آئی اے کے ملازم باپ بیٹا کے خلاف بھی مقدمہ درج کر لیا گیا۔ ڈیوٹی پرموجود اہلکار احتشام الحق گرفتار اور اسکے والد سب انسپکٹر راجہ آصف کی گرفتاری کیلئے چھاپے مارے جا رہے ہیں۔ ویزہ جاری کرنے والی پاکستانی خاتون آفیسرکو بھی مقدمے میں نامزد کیا گیا ہے۔
حساس علاقے میں داخلے اور اہلکاروں سے ہاتھا پائی کے جرم میں میتھیو کو دو ہزار گیارہ میں ویزہ منسوخ کرنے کے بعد بلیک لسٹ کر کے پاکستان بدر کردیا گیا تھا۔ بلیک لسٹ ہونے کے باوجود اسے ہوسٹن میں پاکستانی مشن سے ویزہ جاری کیا گیا۔ متیھیو بیریٹ کی پاکستانی بیوی اوربچے امریکا میں ہی مقیم ہیں۔
