وزارت خارجہ کے حکام نے سعودی عرب میں مختلف کمپنیوں میں کام کرنے والے پاکستانیوں کے واجبات دلوانے کے لیے سعودی حکام سے بات چیت شروع کردی ہے۔
دفتر خارجہ کے ترجمان کے مطابق اس وقت سعد کنٹرکٹنگ اور سعودی اوجر ایسی کمپنیاں ہیں جن میں 8500 پاکستانی کام کر رہے ہیں اور جن کے واجبات ابھی تک ادا نہیں ہوئے۔
اُنھوں نے کہا کہ متعدد پاکستانیوں کے ان کمپنیز میں اپنے معاہدے مکمل ہوچکے ہیں اور اُنھوں نے ان کمپنیوں میں جتنا عرصہ گزارا ہے اس کے واجبات لینا چاہتے ہیں جبکہ دیگر پاکستانی اپنے ماہانہ کے واجبات لینے کے خواہاں ہیں۔ اُنھوں نے کہا کہ بہت سے پاکستانی اس ضمن میں وہاں کی عدالتوں میں بھی جاچکے ہیں۔
واجبات کی ادائیگی کا معاملہ صرف پاکستانیوں کے ساتھ ہی نہیں بلکہ سعودی عرب میں مقیم دیگر ملکوں کے شہریوں کو بھی ایسے ہی مسائل کا سامنا ہے۔
دفتر خارجہ کے ترجمان کا کہنا تھا کہ وزیر اعظم میاں نواز شریف کی ہدایت پر سعودی عرب میں مقیم پاکستانیوں کو درپیش ایسے مسائل کے حل کے لیے پاکستانی سفارت خانے میں ایک سیل قائم کردیا گیا ہے جہاں پر کوئی بھی پاکستانی اپنے مسائل کے بارے میں درخواست دے سکتا ہے۔