انگلینڈ نے سری لنکا کو دوسرے ایک روزہ کرکٹ میچ میں دس وکٹوں سے شکست دے کر پانچ میچوں کی سیریز میں ایک صفر کی برتری حاصل کرلی ۔ بر منگھم میں کھیلے گئے میچ میں سری لنکا نے پہلے بیٹنگ کرتے ہوئے مقررہ پچاس اوورز میں سات وکٹوں کے نقصان پر دو سو چون رنز بنائے ۔ سری لنکا کی طرف سے چندی مال باون ، اوپل تھرنگا تریپن اور میتھیوز چوالیس رنز کے ساتھ نمایاں بیٹسمین رہے ۔ انگلینڈ کی طرف سے پلنکٹ اور عادل رشید نے دو دو کھلاڑیوں کو آوٹ کیا ۔ جواب میں انگلینڈ نے مطلوبہ ہدف صرف چونتیس اعشاریہ ایک اوورز میں بغیر کسی نقصان پر حاصل کر لیا ۔ انگلینڈ کی طرف سے دونوں اوپنرز نے شاندار بیٹنگ کا مظاہرہ کرتے ہوئے سنچریاں کیں ۔ جیسن رائے ایک سو بارہ اور ایلکس ہیلز ایک سو تینتیس رنز کے ساتھ ناٹ آوٹ رہے ۔ جیسن رائے کو میچ کا بہترین کھلاڑی قرار دیا گیا ۔ دونوں ٹیموں کے درمیان سیریز کا پہلا میچ ٹائی ہو گیا تھا ۔