آرمی چیف جنرل راحیل شریف نے جرمنی کے وزیر خارجہ سے ملاقات کی ہے جس میں دونوں ممالک کے باہمی تعلقات ، خطے کی سیکورٹی صورتحال پر تبادلہ خیال کیا گیا۔
جرمن وزیر خارجہ نے دہشت گردی کے خلاف پاکستان کی کوششوں کو سراہا۔
برلن میں ایک تھنک ٹینک کے ساتھ نشست میں آرمی چیف نے پاکستان کو درپیش چیلنجز کو مکمل وضاحت سے پیش کیا۔
جنرل راحیل نے خطے میں امن اور استحکام کے لیے پاکستان کی کوششوں کو بھی اجاگر کیا۔
آرمی چیف نے بتایا کہ آپریشن ضرب عضب میں پورے فاٹا سے دہشت گردوں کا صفایا کرکے سرحد تک پہنچ چکے ہیں۔ اس کارروائی میں دہشت گردوں کے نیٹ ورک بھی پکڑے گئے۔
جنرل راحیل کا کہنا تھا کہ دہشت گردوں کے خلاف کارروائی میں اس مرحلے سے آگے بڑھنے کے لیے عالمی برادری کی حمایت درکار ہے۔
آرمی چیف نے کہا کہ پاکستان نے دہشت گردی کے خلاف جنگ میں کسی بھی دوسری قوم سے زیادہ قربانیاں دی ہیں۔ مقاصد کے حصول تک دنیا کو پاکستان کے ساتھ کھڑے ہونے کی ضرورت ہے
جنرل راحیل کا کہنا تھا کہ دہشت گردی عالمی مسئلہ بن چکا ہے جس سے نمٹنے کے لیے عالمی ردعمل ضروری ہے۔ دہشت گردی کے خلاف کامیابی کے لیے تمام فریقین کا متحدہ ردعمل چاہیے۔
