بھارت کی جانب سے لائن آف کنٹرول پر بلا اشتعال فائرنگ کا سلسلہ جاری ہے جس کے نتیجے میں 3 پاکستانی فوجی شہید ہوگئے ہیں۔ پاک فوج کی جوابی فائرنگ میں 7 بھارتی فوجی مارے گئے ہیں۔
آئی ایس پی آر کی جانب سے جاری کئے گئے بیان کے مطابق بھارتی فوج کی بلااشتعال فائرنگ کے نتیجے میں پاک فوج کے کیپٹن تیمور، حوالدار مشتاق اور لانس نائک غلام حسین شہید ہوئے ہیں۔
بھارتی فوج کی جانب سے ایل او سی کے مختلف حصوں پر بھی صبح سے فائرنگ کی جارہی ہے۔ آئی ایس پی آر کے مطابق بھارتی فوج کی جانب سے شہری آبادی کو نشانہ بنایا جارہا ہے۔ فائرنگ کا یہ سلسلہ تاحال جاری ہے۔
صبح پیش آنے والے واقعے میں بھارتی فوج کی جانب سے ایک مسافر بس کو راکٹ سے نشانہ بنایا گیا تھا جس کے نتیجے میں 10 افراد شہید ہوگئے تھے۔ اس واقعے میں اس ایمبولینس کو بھی بھارتی فوج نے نشانہ بنایا تھا جو زخمیوں کو لینے کیلئے بس تک گئی تھی۔اس واقعے میں 15 افراد زخمی ہوئے تھے۔
گزشتہ دو ماہ کے دوران بھارت کی جانب سے جنگ بندی معاہدے کی 230 بار خلاف ورزی کی گئی ہے۔ اس کے جواب میں پاکستان کی جانب سے 13 بار بھارتی ڈپٹی ہائی کمشنر کو دفتر خارجہ طلب کیا گیا اور احتجاج ریکارڈ کروایا گیا۔
پاکستان گزشتہ 2 ماہ کے دوران دو بار بھارتی ہائی کمشنر کو بھی احتجاج ریکارڈ کروانے کیلئے دفتر خارجہ طلب کرچکا ہے۔