آصف زرداری کی عنقریب وطن واپسی

سابق صدر آصف علی زرداری نے اپنی جلد وطن واپسی کا اشارہ دیا ہے۔ انہوں نے کہا ہے کہ وہ جلاوطن نہیں، بلکہ چند ہفتوں میں وطن واپس آئیں گے۔
سابق صدر نے معروف صحافی حامد میر کو انٹرویو دیا ہے جس میں انہوں نے پاکستانی سیاست پر ذومعنی تبصرے بھی کئے ہیں۔ آصف علی زرداری نے عمران خان پر پھبتی بھی کسی۔
آصف علی زرداری نے کہا کہ “انوکھا لاڈلا کھیلن کو مانگے چاندنی”۔ انہوں نے کہا کہ چاندنی سے مراد وزارت عظمی ہے۔ امکان ہے کہ آصف علی زرداری آئندہ ماہ اپنی اہلیہ اور سابق وزیراعظم محترمہ بینظیر بھٹو کی برسی کے موقع پر واپس آئیں گے۔
آصف علی زرداری گزشتہ ایک برس سے دبئی میں خود ساختہ جلاوطنی کی زندگی گزار رہے ہیں۔ انہوں نے یہ جلاوطنی اختیار کرنے سے قبل ایک جلسے سے خطاب کرتے ہوئے پاک فوج کے بارے میں سخت تبصرے کئے تھے۔