میئر کراچی کی رہائی کے بعد ایم کیو ایم پاکستان کی جانب سے جشن منایا جا رہا تھا۔ اس موقع پر ایم کیو ایم پاکستان اور ایم کیو ایم لندن کے کارکنان اس وقت آمنے سامنے آ گئے اور شدید لڑائی ہوئی۔
ایم کیو ایم پاکستان کے کارکنان کی بڑی تعداد جناح گراؤنڈ میں موجود تھی اس موقع سے فائدہ اٹھا کر ایم کیو ایم لندن کے کارکنوں نے عزیز آباد جناح گراؤنڈ میں یادگار شہداء پر جانے کی کوشش کی۔
ایم کیو ایم پاکستان کی جانب سے روکنے پر ایم کیو ایم لندن کے کارکنوں نے الطاف حسین کے حق می ںنعرے بازی شروع کر دی۔ دونوں مخالف جماعتوں کے کارکنوں نے اپنی اپنی قیادت کے حق میں اور ایک دوسرے کے خلاف نعرے بازی شروع کر دی۔
ایم کیو ایم پاکستان کے کارکنوں نے ایم کیو ایم لندن کے کارکنوں کو یادگار شہداء جانے سے روکنا چاہا تو صورتحال کشیدہ ہو گئی اور چند کارکن الجھ بھی پڑے۔ پولیس نے موقع پر پہنچ کر ایم کیو ایم لندن کے کارکنان کو منتشر کرنے کیلئے کاٹھی چارج شروع کر دیا اور انہیں گرفتار بھی کیا۔
اس موقع پر دونوں جانب سے عورتیں اور بچے بھی موجود تھے۔ جناح گراؤنڈ کے اردگرد کے علاقے میں پولیس اور متحدہ لندن کے کارکنان کے درمیان کافی دیر تک آنکھ مچولی کھیلی جاتی رہی۔