فیس بک کے پروفائل مینو میں ایک بھیانک غلطی کے باعث کچھ وقت کے لئے بانی مارک زکر برگ سمیت تقریبا تمام صارفین کو مردہ قرار دے دیا گیا، غلطی کا احساس ہوتے ہی یہ پیغامات ہٹا لئے گئے۔
اگرچہ یہ پیغام چند لمحوں کے لئے شیئر کئے گئے لیکن اس وقت فیس بک استعمال کرنے والے بہت سے افراد نے یہ پیغامات پڑے، مارک زکربرگ کی موت پر تعزیتی پیغامات کا سلسلہ بھی شروع ہو گیا۔
فیس بک کے مطابق انتقال کر جانے والے افراد کی پروفائل کے لیے مخصوص پیغام بہت مختصر وقت کے لیے دیگر فیس بک اکاؤنٹس پر پوسٹ ہوگیا۔ یہ ایک خوفناک غلطی تھی جسے درست کر لیا گیا ہے۔
ایک اندازے کے مطابق اس طرح کے پیغامات 2 ارب صارفین کے پروفائل پر پوسٹ کئے گئے جن میں لاکھوں مشہور شخصیات سمیت عام صارفین بھی شامل ہیں۔
فیس بک کے بانی مارک زکربرگ کی پروفائل پربھی یہ پیغام پوسٹ ہوگیا، جس میں لوگوں سے کہا گیا کہ جو لوگ ان سے محبت کرتے ہیں، انھیں دیگر لوگوں کی جانب سے خراج عقیدت کے طور پر کی گئی پوسٹس کو دیکھ کر سکون ملے گا۔
سماجی رابطے کی ویب سائٹ ٹوئٹر پر بھی اس حوالے سے پیغامات کی بھرمار شروع ہوگئی اور #FacebookDead کے ہیش ٹیگ کے ساتھ لوگوں نے ٹویٹس شروع کردیں۔
اداکارہ کورٹنی ایلنو نے لکھا، فیس بک کے مطابق میں مر چکی ہوں۔ مارک زکر برگ کی موت پر بھی صارفین نے اپنے پیغامات دیئے، ایک صارف نے لکھا اتنے اچھے انسان کا ایسا انجام سوچا نہیں تھا۔
فیس بک کی اس غلطی کو جہاں کچھ لوگوں نے پروموشن کا ایک ذریعہ بتایا تو وہیں فیس بک نے اپنی غلطی تسلیم کرتے ہوئے معذرت بھی کی ہے۔ ایسا خدشہ ظاہر کیا جا رہا ہے کہ فیس بک پر اس سلسلے میں قانونی کارروائی بھی کی جا سکتی ہے۔
