اٹلی کے تاریخی شہر فلورنس پر معروف فاسٹ فوڈ چین میکڈونلڈ نے مقدمہ دائر کر دیا ہے۔ مقدمےمیں فلورنس کی انتظامیہ سے بیس ملین ڈالر ہرجانے کا مطالبہ کیا گیا ہے۔
فلورنس نے گزشتہ ماہ میکڈونلڈ کو شہر کے مرکزی تاریخی مقام ’’ڈومو‘‘ میں ریسٹورنٹ کھولنے کی درخواست مسترد کی تھی۔ انتظامیہ کا کہنا تھا کہ وہ شہر کے تاریخی ورثے کو بچانے کے لئے اب مرکز میں مزید دکانیں کھولنے کی اجازت نہیں دیں گے۔
میئر نے میڈیا سے گفتگو میں کہا کہ میکڈونلڈ نے قانونی حق کے مطابق درخواست دی اور ہم قانون کے مطابق مسترد کر دی۔ ایسے میں وکلا انہیں جواب دیں گے۔ تاہم شہر کی تاریخ کو بچانے کے لئے وہ کسی بھی حد تک جانے کے لئے تیار ہیں۔ موجود ریسٹورنٹس کو بھی دوبارہ لائسنس لینے کا حکم دیا گیا ہے۔
ادھر میکڈونلڈ کا کہنا ہے کہ انہوں نے انتظامیہ کو یقین دلایا تھا کہ وہ اپنے کام کے طریقے کو تبدیل کریں گے اور کسی بھی صورت شہر کو نقصان نہیں پہنچائیں گے۔ ایسے میں درخواست مسترد کر کے اتنے بڑے ادارے پر غیر ذمہ داری کا الزام لگایا گیا ہے جو قابل قبول نہیں۔