داعش سے جنگ، ایرانی کرد خواتین بھی پیش پیش

شمالی عراق میں داعش کے خلاف جنگ میں جہاں ترک اور شام کی سرحد پر بسنے والے کرد شریک ہیں وہیں ایران اور عراق کی سرحد پر کرد علاقوں کی 200 سے زائد خواتین بھی اس جنگ کا حصہ ہیں۔
داعش کو عراق اور شام میں عراقی فوج کے بعد سب سے زیادہ نقصان کرد جنگ جوؤں نے پہنچایا ہے۔ 600 کرد فائٹرز پر مشتمل اس دستے کو پی اے کے کا نام دیا گیا ہے۔ اس دستے میں نصف تعداد خواتین کی ہے۔
یہ خواتین کردوں کی فورس پیش مرگہ میں شامل ہیں اور انہیں امریکی افواج کی حمایت بھی حاصل ہے۔ جب بھی داعش کے عسکریت پسندوں کی طرف سے ایران کی ان کرد خواتین پر مارٹر گولے برسائے جاتے ہیں تو جوابی فائرنگ سے قبل یہ خواتین فائٹرز لاؤڈ اسپیکرز پر گانے بھی گاتی ہیں۔
اکیس سالہ مانی نصرالل بھی انہیں فائٹرز میں سے ایک ہیں اور ان کا کہنا ہے کہ وہ گیت اس وجہ سے گاتی ہیں تاکہ داعش کے عسکریت پسندوں کو مزید غصہ آئے۔
مانی کا کہنا ہے کہ ہم ان کو بتانا چاہتی ہیں کہ ہمیں ان کا خوف اور ڈر نہیں ہے۔ ایک کرد خاتون جنگ جو کا کہنا ہے کہ وہ اپنی سرزمین کی حفاظت کے لیے لڑ رہی ہیں۔
وہ سرزمین چاہیے ایران کے قبضے میں ہو یا عراق کے وہ اپنی سر زمین کے لیے ایسے ہی کریں گی۔ ان کے سامنے چاہے داعش ہو یا کوئی دوسری طاقت اوہ اپنی مقبوضہ سرزمین کی آزادی کے لیے لڑیں گی۔
اس وقت یہ خواتین مرد کردوں کے ہم راہ عراق کے شمال میں واقع فضلیہ نامی ایک دیہات میں لڑ رہی ہیں۔ ایک 32سالہ جنگ جو ایوین اویسی کا کہنا تھا، یہ حقیقت ہے کہ داعش خطرناک ہے لیکن ہمیں اس کی پروا نہیں ہے۔
چھ سو جنگ جووں پر مشتمل یہ یونٹ اب عراقی اور امریکی فورسز کے زیر کنٹرول اس یونٹ کے ساتھ ہے، جو موصل میں داعش کے خلاف برسر پیکار ہے۔ کرد جنگ جووں کا اپنے ایک آزاد کردستان کے قیام کا بھی منصوبہ ہے۔
مستقبل میں کرد جنگ جو شام، عراق، ترکی اور ایران کے چند حصوں پر مشتمل اپنا وطن بنانا چاہتے ہیں لیکن ان تمام ممالک کی طرف سے اس منصوبے کی شدید مخالفت کی جاتی ہے۔ یہی وجہ ہے کہ ترکی کرد باغیوں کے خلاف کارروائیاں جاری رکھے ہوئے ہے۔
ایک جنگ جو کا کہنا تھا کہ اس نے پیش مرگہ میں شمولیت کا فیصلہ اس وقت کیا تھا، جب ہر طرف یہ خبریں آ رہی تھیں کہ داعش کے فائٹرز خواتین کے ساتھ انتہائی برا سلوک کر رہے ہیں۔ تب میں نے فیصلہ کیا کہ ان کو میں بھی جواب دوں گی۔
ان خواتین کی شمالی عراق میں موجودگی متنازعہ بن چکی ہے۔ ایران نے کردستان کی علاقائی حکومت پر ان خواتین کو بے دخل کرنے کے لیے دباؤ بڑھا دیا ہے۔
ان کے مرد کمانڈر حاجر باہمانی کا کے مطابق ان خواتین کے ساتھ مردوں کے برابر سلوک کیا جاتا ہے اور انہیں ان خواتین پر فخر ہے۔ ان خواتین کو چھ ہفتوں پر مشتمل سنائپر ٹریننگ بھی فراہم کی گئی ہے۔