الزام لگانے والے ناکام ہوں گے، حکومتی ٹیم

سپریم کورٹ میں پاناما کیس کی سماعت کے بعد حکومتی ٹیم نے کہا ہے کہ الزام لگانے والے ناکام ہوں گے، وزیر اعظم کو ان کے موقف میں کامیابی ملے گی۔
سپریم کورٹ کے باہر میڈیا سے گفتگو کرتے ہوئے وفاقی وزیر اطلاعات و نشریات مریم اورنگزیب نے کہا کہ وزیراعظم خود کو احتساب کے لیے پیش کرچکے ہیں۔
انہوں نے کہا کہ وزیر اعظم نے اپنے وعدے کے مطابق خود کو احتساب کے لئے پیش کیا ہے، سپریم کورٹ کی طرف سے آنے والا ہر فیصلہ قبول ہو گا۔ امید ہے کہ اپوزیشن والے بھی فیصلہ مانیں گے۔
اس موقع پر ن لیگ کے رہنما طارق فضل چودھری نے کہا کہ تحریک انصاف سڑکوں پر عدالت لگانے کی بہت شوقین ہے،پی ٹی آئی سے گزارش ہے کہ ایک وقت میں ایک ہی عدالت لگائے۔
ن لیگ کے رہنما طلال چودھری نے کہا کہ پہلے نواز شریف کو ایٹمی دھماکوں پر نشانہ بنایا گیا اب اب سی پیک پر نشانہ بنایا جارہا ہے۔
انہوں نے کہا کہ جس کے پاس ثبوت ہے وہ بات کرے، نواز شریف کو مائنس کرنے کی باتیں کرنے والے مسترد ہوچکے ہیں۔ پہلے بھی عدالتوں اور الیکشن کمیشن میں ن لیگ کامیاب ہوئی، اب بھی کامیابی ن لیگ کو ہی ملے گی۔