مناسکِ حج کا آغاز شروع ہوگیا ہے ۔ نماز فجر کے بعد دنیا بھر سے آئے لاکھوں مسلمانوں کی مکہ المکرمہ سے منیٰ روانگی جاری ہے۔ رکن اعظم وقوف عرفات کل ادا کیا جا ئے گا۔
دنیا بھرسے آئے ہوئے14لاکھ سے زائد مسلمان اور سعودی عرب میں مقیم لاکھوں افراد لبیک الھم لبیک کی صدائیں بلند کرتے ہوئے منٰی میں قائم خیموں کے شہر میں گزشتہ رات سے ہی پہنچنا شروع ہو گئے جہاں وہ آج ظہر، عصر، مغر ب اور عشاء کی نمازیں ادا کریں گے۔
سعودی حکومت نے لاکھوں مسلمانوں کی طرف سے حج کی ادائیگی کیلئے تمام انتظامات مکمل کر لئے ہیں۔ منٰی میں سب حاجیوں کو ان کے معلمین کے ذریعے خیمے الاٹ کر دئیے گئے ہیں۔ پاکستان حج مشن مکہ میں پاکستانی عازمین حج کی معاونت و رہنمائی اور فلاح و بہبود کیلئے 1600 اہلکاروں پر مشتمل عملہ تعینات کر دیا ہے ۔
سعودی ولی عہد وزیر داخلہ اور سپریم حج کمیٹی کے چیئرمین شہزادہ محمد بن نائف نے خبردار کیا ہے کہ سعودی حکومت حج کی حرمت اور عازمین حج کی سکیورٹی کو متاثر کرنے والی کسی بھی سرگرمی اور حج کے اجتماع کو سیاسی مقاصد کے لئے استعمال کرنے اور اس موقع پر کسی قسم کی نعرے بازی یا مظاہرے کی اجازت نہیں دے گی۔
سعودی وزارت صحت نے حاجیوں کو فوری طبی امداد مہیا کرنے کیلئے937 ہیلپ لائن قائم کردی ہے۔ کسی ایمرجنسی کی صورت میں حاجی اپنے موبائل سے کال یا ایس ایم ایس کر کے مدد طلب کر سکتے ہیں۔