انگلینڈ نے پاکستان کو آخری ون ڈے میں جیت کے لیے 303رنز کا ہدف دیا ہے۔
کارڈیف میں بادلوں سے بھرا آسمان دیکھتے ہوئے کپتان اظہر علی نے ٹاس جیت کر انگلینڈ کو پہلے بیٹنگ کی دعوت دی۔
انگلش ٹیم نے پُراعتماد انداز میں کھیل کا آغاز کیا لیکن ایلکس ہیلز اس بار لمبی اننگز نہ کھیل پائے۔ عامر نے 23 رنز پر انہیں پویلین واپس بھیج دیا۔
انگلینڈ کو دوسرا نقصان 64 کے مجموعی سکور پر ہوا اور جو روٹ 9 رنز بناکر حسن علی کا شکار بن گئے۔
انگلش کپتان اوئن مورگن 10 رنز بناکر عماد وسیم کی گیند پر انہی کے ہاتھوں کیچ آؤٹ ہوئے۔
ایسے میں اوپنر جیسن روئے نے 87 رنز کی انتہائی اہم اننگز کھیلی جس کا خاتمہ محمد عامر نے کیا۔
بین سٹوکس اور جونی بیئرسٹو نے ایک اور اہم شراکت داری قائم کی تاہم بیئرسٹو 33 رنز بناکر عمر گل کی گیند پر واپس پویلین پہنچ گئے۔
سٹوکس کی 75 رنز کی اننگز کا خاتمہ حسن علی نے کیا۔ ڈاسن اور ووکس صرف دس دس رنز بناسکے۔ ویلی نے 6 رنز سکور کئے۔
جورڈن 15 اور مارک وڈ 7 رنز بناکر ناٹ آؤٹ رہے۔
پاکستان کی طرف سے حسن علی نے 4 اور محمد عامر نے 3 کھلاڑیوں کو آؤٹ کیا۔ عماد وسیم اور عمر گل کے حصے میں ایک ایک وکٹ آئی۔
واضح رہے کہ انگلینڈ ٹیم کو پانچ ایک روزہ میچوں کی سیریز میں پہلے ہی چار صفر کی فیصلہ کن برتری حاصل ہے
