ڈونلڈ ٹرمپ نے امیگرنٹس کے حوالے سے دیئے گئے متنازعہ بیانات پر یو ٹرن لے لیا۔ ٹرمپ ہنگامی طور پر میکسیکو کے صدر سے ملاقات کریں گے
ری پبلکن پارٹی کے صدارتی امیدوار ڈونلڈ ٹرمپ نے صدارتی مہم کے دوران امریکا کے تارکین وطن کے حوالے سے بہت متنازعہ اور اشتعال انگیز پوزیشن لی تھی۔ میکسیکو کے صدر کے ساتھ ہنگامی ملاقات کے اعلان کو امریکی میڈیا ٹرمپ کا بڑا جوا قرار دے رہا ہے۔ میکسیکو کی حکومت امریکا پر کڑی تنقید کرتی ہے۔ امریکا میں رہنے والے ایک کروڑ 10 لاکھ تارکین وطن میں سے آدھی تعداد میکسیکو کے شہریوں کی ہے۔ اگرچہ ٹرمپ کی کوشش ہے کہ وہ عام انتخابات میں تارکین وطن کے دل جیت سکیں مگر یہ کوشش انکو ناقابل تلافی نقصان بھی پہنچا سکتی ہے۔ میکسیکو کی سرحد امریکا میں تارکین وطن کے غیر قانونی داخلے کا سب سے مصروف راستہ ہے۔ ٹرمپ نے صدارتی مہم کے دوران کہا کہ وہ میکسیکو کے ساتھ واقع سرحد پر کنکریٹ کی دیوار بنانے ارادہ رکھتے ہیں۔ ایک بیان میں انہوں نے میکسیکو کے تارکین وطنوں کے لیے غیر اخلاقی زبان کا استعمال کیا۔
