وزیر پانی و بجلی عابد شیر علی نے لاہور میں لیسکو دفاتر کا اچانک دورہ کیا۔ اس موقع پر میڈیا سے گفتگو میں ان کا کہنا تھا کہ سیاسی ٹھگ اور ڈبل شاہ اکٹھے ہوگئے ہیں۔ سیاسی کزنز پہلے بھی ناکام ہوئے، اب بھی ناکام ہوں گے۔ خدشہ ہے کہ لاہوریے ان کی پھینٹی نہ لگا دیں۔
انہوں نے کہا کہ احتجاج کرنے والے دشمن کے ایجنڈے پر ہیں۔
عابد شیر علی کا کہنا تھا کہ پاکستان کے خلاف بات کرنے والوں کو مینار پاکستان پر سزا ملنی چاہیے۔ پاکستان دشمن کا ساتھی اور حمایت کرنے والا بھی مجرم ہے۔ پاکستان ہمیشہ زندہ باد ہوگا۔
وزیر قانون پنجاب رانا ثنااللہ نے کہا عمران خان کا احتجاج سسرالی ایجنڈا ہے۔ ان کے احتجاجی مارچ کو نہیں روکا جائے گا۔ پنجاب میں بھی ایم کیو ایم کے بانی کی طرح دو افراد انتشار اور عدم استحکام کے ایجنڈے پر کام کر رہے ہیں۔ عمران 2018 انتخاب میں ناکامی کے بعد باقی زندگی سسرال گزاریں گے۔
رانا ثنااللہ کا کہنا تھا شیخ رشید کے ہوتے ہوئے عمران خان کو کسی دشمن کی ضرورت نہیں۔ صوبائی وزیر قانون نے واضح کیا کہ جب تک کسی کو عدالت سے سزا نہ ہو وہ نااہل نہیں ہوتا۔ وسیم اختر کو ملک کا قانون حلف اٹھانے کی اجازت دیتا ہے۔