سعودی عرب کے وزیر دفاع اور نائب ولی عہد شہزادہ محمد بن سلمان السعود نے اتوار اور پیر کی درمیانی شب پاکستان کا مختصر دورہ کیا۔
اسلام آباد پہنچنے کے بعد انھوں نے وزیراعظم نواز شریف سے ملاقات کی۔ ملاقات کے دوران پاکستان کے وزیر دفاع خواجہ آصف اور مسلح افواج کے سربراہان بھی موجود تھے۔
وزیراعظم کے ساتھ ملاقات کے دوران پاکستان اور سعودی عرب کے درمیان دو طرفہ تعلقات کے فروغ پر بات ہوئی۔
سعودی سرکاری خبر رساں ایجنسی کے مطابق سعودی وزیر دفاع نے مسلمان ممالک سمیت دنیا بھر میں ہونے والی پیش رفت پر تبادلہ خیال کیا۔
سرکاری ایجنسی کے مطابق سعودی وزیر دفاع نے وزیراعظم نواز شریف سے ملاقات میں اس بات پر زور دیا کہ پالیسیوں میں ہم آہنگی اور بین الاقوامی فورم پر ایک دوسرے کے ساتھ تعاون کو مزید جاری رکھا جائے گا۔
سعودی عرب کے نائب ولی عہد شہزادہ محمد بن سلمان نے اپنے مختصر دورے میں پاکستان کی بری فوج کے سربراہ جنرل راحیل شریف سے بھی ملاقات کی۔
