ترکی میں دو مختلف کار بم دھماکوں میں ہلاکتوں کی تعداد چھ ہوگئی جبکہ دو سو سے زائد زخمی ہوئے ہیں۔
ترک حکام کے مطابق مشرقی شہر الازیغ میں خودکش حملہ آور نے بارود سے بھری کار پولیس اسٹیشن سے ٹکرا دی۔
اس حملے میں عمارت کو شدید نقصان پہنچا جبکہ متعدد ہلاکتوں کے ساتھ دو سو سے زائد افراد بھی زخمی ہوگئے۔
اس سے پہلے مشرقی ترکی میں ہی ’وان‘ کے پولیس اسٹیشن پر بھی خودکش حملہ کیا گیا جہاں کار بم دھماکے میں ایک شخص ہلاک اور دو زخمی ہوگئے۔
دھماکے سے عمارت کو شدید نقصان پہنچا جبکہ زخمیوں میں بھی اکثریت پولیس اہلکاروں کی ہے۔
مقامی میڈیا کے مطابق حملہ کردستان ورکرز پارٹی کے دہشت گردوں نے کیا ہے تاہم ابھی تک کسی گروپ نے اس کی ذمہ داری قبول نہیں کی۔