پاکستان اور انگلینڈ کے درمیان ٹیسٹ سیریز برابری پر ختم ہوگئی۔ اوول کا ٹیسٹ سہیل خان اور یاسر شاہ کو 5 ، 5 وکٹوں کے ساتھ یاد رہے گا۔ وہیں اسد شفیق بھی اپنی سنچری کی بدولت ریکارڈ بک میں رہیں گے۔
اوول کا اصل مرد میدان یونس خان ہے جنہیں شاندار ڈبل سنچری پر مین آف دی میچ ایوارڈ دیا گیا۔ کپتان مصباح الحق نے یونس خان کو چیمپئن قرار دیا ہے۔ ان کا کہنا تھا کہ یونس پر سکور نہ کرنے کی وجہ سے دباؤ تھا۔ اس پر مسلسل تنقید کی جارہی تھی۔ ایسے میں یونس نے اپنی بلے بازی سے سب ناقدین کے منہ بند کردئیے۔
پاکستان کے مین آف دی سیریز کپتان مصباح الحق رہے ہیں جنہوں نے لارڈز کے میدان میں سنچری کے ساتھ اس دورے کے آغاز کو یادگار بنایا اور اوول میں جیت کے ساتھ خوشگوار انداز میں اختتام بھی کیا۔ پوری سیریز میں ان کی ذمہ دارانہ بلے بازی اور قائدانہ صلاحیتوں پر انہیں مین آف دی میچ کا ایوارڈ دیا گیا۔
انگلش ٹیم کے مین آف دی سیریز کرس ووکس رہے۔ نوجوان کھلاڑی نے گیند اور بلے دونوں کے ساتھ بہترین کھیل پیش کیا۔ انہیں آل راؤنڈ کارکردگی پر ایوارڈ دیا گیا۔
