اوول ٹیسٹ کے تیسرے دن انگلش ٹیم مکمل بے بس نظر آئی۔ پہلے یونس خان نے بولرز کی خوب درگت بنائی اور پوری سیریز میں ناکامی کا غصہ اتارا۔ بولنگ میں یاسر شاہ نے میزبان ٹیم کے ٹاپ آرڈر کو زیادہ دیر وکٹ پر ٹکنے نہ دیا۔
یونس خان نے 101 رنز سے آج اپنی اننگز شروع کی اور اسے 218 تک لے کر گئے۔ یاسر شاہ نے ہیلز، روٹ اور ونس کو پویلین پہنچایا۔ دونوں کی بہترین کارکردگی سے پاکستان نے میچ پر گرفت مضبوط کرلی ہے۔
انگلینڈ نے تیسرے دن کے اختتام پر 88 رنز بنائے ہیں اور اس کے 4 کھلاڑی پویلین لوٹ چکے ہیں۔ پاکستان کی برتری ختم کرنے کے لیے انہیں ابھی مزید 126 رنز درکار ہیں۔ بیئرسٹو 14 اور بیلنس 4 رنز پر کھیل رہے ہیں۔
پاکستان کی طرف سے یونس خان اور سرفراز احمد نے تیسرے دن کا کھیل شروع کیا۔ سرفراز نے اپنے روایتی انداز میں سکور بورڈ کو تیزی سے آگے بڑھایا۔ انہوں نے یونس خان کے ساتھ 77 رنز کی اہم پارٹنرشپ قائم کی۔ سرفراز 44 رنز پر ووک کا شکار بنے۔
اس کے بعد پاکستان کی برتری بہتر بنانے کی تمام تر ذمہ داری یونس خان پر تھی جو انہوں نے بہترین طریقے سے نبھائی۔ پہلے وہاب ریاض کو ساتھ لے کر چلے تاہم وہ 434 کے مجموعی سکور پر 4 رنز بناکر آؤٹ ہوگئے۔
محمد عامر نے یہاں سے یونس کا بہترین ساتھ دیا اور اننگز کے اختتام تک بیٹنگ کرتے رہے۔ 531 کے مجموعی سکور پر پاکستان کے نویں آؤٹ ہونے والے کھلاڑی یونس خان تھے۔ انہوں نے 218 رنز سکور کئے جس میں 4 چھکے اور 31 چوکے شامل تھے۔
سہیل خان نے 2 رنز بناکر آؤٹ ہونے والے آخری کھلاڑی تھے یوں 542 رنز پر پاکستان کی اننگز کا خاتمہ ہوا۔
