کراچی میں بارش کو ترسنے والوں کے لئے ابر رحمت زحمت بن گیا۔مسلسل بارش سے شہر کے نشیبی علاقوں میں برساتی پانی جمع ہوگیا۔
مسلسل ہونے والی بارش نے شہریوں کو ذہنی اذیت میں مبتلا کر دیا۔ بارش کے باعث سڑکوں پر پانی جمع ہو گیا۔ شہر کی مختلف شاہراہوں پر بدترین ٹریفک جام ، بے شمار گاڑیاں بند ہوگئیں۔ شہریوں نے منٹوں کا سفر گھنٹوں میں طے کیا۔
بارش کی چند بوندیں پڑتے ہی الیکٹرک کی ایکسٹرا ہائی ٹینشن لائن بھی بند ہو گئی۔ 400 فیڈرز ٹرپ ہونے سے شہر کا بڑا حصہ بجلی سے محروم ہو گیا ۔
بجلی کے تعطل کے باعث دھابے جی پمپنگ اسٹیشن کی 72 انچ قطر کی پائپ لائن بھی پھٹ گئی اور 22پمپنگ اسٹیشن بند ہونے سے کراچی کو پانی کی فراہمی معطل ہو گئی ۔
شہر قائد میں بارش کے بعد مختلف علاقوں میں کرنٹ لگنے کے واقعات پیش آئے جس میں 7افراد زندگی کی بازی ہار گئے ۔
