ایجبسٹن ٹیسٹ کے تیسرے دن انگلینڈ نے میچ میں بھرپور واپسی کی ہے۔
ایلسٹر کک اور ایلکس ہیلز کی 120 رنز کی پارٹنر شپ نے مصباح الیون کے لیے خطرے کی گھنٹی بجادی ہے۔
انگلش ٹیم کو پاکستان پر 17 رنز کی برتری حاصل ہوگئی ہے اور اس کی تمام وکٹیں باقی ہیں۔ کک 64 اور ہیلز 50 رنز پر کھیل رہے ہیں۔
سہیل خان کے 5 شکار
ایجبسٹن ٹیسٹ میں پاکستان کی پوزیشن مضبوط
اس سے پہلے دن کے آغاز پر پاکستان نے 257 رنز سے کھیل شروع کیا تو 21 رنز پر کھیل رہے یونس خان کا ساتھ دینے مصباح الحق آئے۔
یونس خان آج صرف 10 رنز بناپائے اور 31 رنز پر ووکس کا شکار ہوگئے۔ اس سیریز میں اب تک وہ ایک بھی بڑی اننگز نہیں کھیل پائے۔
پاکستان کے اگلے آؤٹ ہونے والے کھلاڑی اسد شفیق تھے جو 18 گیندیں کھیل کر بغیر کھاتہ کھولے پویلین لوٹ گئے۔ اسد کو براڈ نے بولڈ کیا۔
اس کے بعد کپتان مصباح الحق اور سرفراز احمد کے درمیان 62 رنز کی اہم پارٹنر شپ ہوئی۔ مصباح الحق 56 رنز کی اننگز کھیل کر اینڈرسن کی گیند پر بولڈ ہوگئے۔ اس وقت پاکستان کا مجموعی سکور 358 تھا۔
اس کے بعد پاکستانی ٹیل اینڈرز وکٹ پر رکنے کی کوشش کرتے رہے اور سرفراز احمد اکیلے سکور بورڈ کو چلانے کی کوشش کرتے رہے۔
یاسر شاہ نے 7، عامر نے ایک، سہیل خان نے 7 اور راحت علی نے 4 رنز بنائے۔
پاکستان کی پوری ٹیم 400 رنز پر آؤٹ ہوگئی۔ سرفراز احمد 46 رنز پر ناٹ آؤٹ رہے۔
انگلینڈ کی طرف سے براڈ اور ووکس نے تین تین کھلاڑیوں کو آؤٹ کیا۔ اینڈرسن کے حصے میں دو وکٹیں آئیں۔ سمیع اسلم اور یاسر شاہ رن آؤٹ ہوئے۔
