وفاقی وزیر خزانہ اسحاق ڈار کا کہنا ہے کہ صدر ممنون حسین نے انکم ٹیکس ترمیمی آرڈیننس 2016 کی منظوری دے دی ہے۔ کسٹم ایکٹ پاٹا اگلے 24 گھنٹوں میں ختم کیا جارہا ہے۔ قانون تیار ہوچکا ہے آج سے آرڈیننس کے ذریعے نافذ کیا جائے گا۔
پریس کانفرنس سے خطاب کرتے ہوئے اسحاق ڈار نے کہا کہ شہدا کو دئیے جانے والے پلاٹس پر کیپٹل گین ٹیکس نہیں لگے گا اور شہدا کے پلاٹس کی پہلی فروخت پر بھی کیپٹل گین ٹیکس معاف ہوگا۔ غیر منقولہ جائیداد کی فروخت سے متعلق قانون فوری طور پر نافذ العمل ہوگا۔
وزیر خزانہ کا کہنا تھا کہ ٹی آر او کمیٹی کا اجلاس 6 اگست کو ممکن نہیں ہے۔ اجلاس یکم اگست اور دو اگست کو دوپہر سے پہلے ہو سکتا ہے۔ اگر ایسا نہ ہوا تو سپیکر سے 8 یا 9 اگست کو میٹنگ کی بات کریں گے۔
اسحق ڈار کا کہنا تھا کہ تحریک انصاف کی 7 اگست کی ریلی سے کوئی فرق نہیں پڑتا۔ انہوں نے تحریک انصاف کو مشورہ دیا کہ سیاست ہوتی رہے گی۔ کے پی حکومت چترال کی صورتحال پر توجہ دے، جہاں اتنے لوگ مر رہے ہیں۔