قومی کرکٹ ٹیم کے بیٹسمین اورسابق کپتان شعیب ملک نے کہا ہے کہ ورلڈ الیون ٹیم پاکستان آنے کا کریڈٹ پی سی بی کو جاتا ہے،کوشش کرونگا جب تک فٹ ہوں کھیلتا رہوں۔
لاہور کے قذافی اسٹیڈیم میں میڈیا سے گفتگو میں سابق کپتان کا کہنا تھا کہ ورلڈ الیون کے اسکواڈ میں بیٹنگ سائیڈ بہت زبردست ہے، تاہم ہوم گراؤنڈ پر ٹیم شائقین کو مایوس نہیں کرے گی۔
انہوں نے کہا کہ پاکستانی کھلاڑی گراؤنڈ پر ڈومیسٹک کرکٹ کھیلتے ہیں اس لیے انہیں کنڈیشنز میں ایڈجسٹ ہونے میں کوئی مسئلہ نہیں ہوگا۔
شعیب ملک نے کہا کہ سینئر کھلاڑی ہونے کی حیثیت سے نوجوانوں کو مشورے دینے پڑتے ہیں ۔
انہوں نے کہا کہ زیادہ تر کھلاڑیوں نے پاکستان میں بین الاقوامی کرکٹ نہیں کھیلی اور یہاں پر کرکٹ کھیلنے کے احساسات کو لفظوں میں بیان کرنا مشکل ہے۔
سابق کپتان نے مزید کہا کہ کوشش کروں گا جب تک فٹ ہوں کھیلتا رہوں تاہم 2023ابھی بہت دور ہے ،ہوسکتا ہے اُس میں میر ا بیٹا کھیلے ۔