برمنگھم ٹیسٹ میں دوسرا دن پاکستانی بلے بازوں کے نام رہا۔ انگلش بولرز دن بھر وکٹ ملنے کا انتظار کرتے رہے۔
پہلے دن سہیل خان نے بولنگ میں اپنی سلیکشن درست ثابت کی تو آج سمیع اسلم 82 رنز کی اننگز کھیل کر اپنا انتخاب صحیح ثابت کیا۔ اظہر علی کی شاندار سنچری سے پاکستان کی میچ پر گرفت مضبوط ہوگئی ہے۔
قومی ٹیم نے دن کے اختتام پر 257 رنز بنائے ہیں اور سات وکٹیں باقی ہیں۔ پاکستان کو انگلینڈ کی پہلی اننگز میں برتری ختم کرنے کے لیے مزید 42 رنز درکار ہیں۔
دوسرے دن محمد حفیظ نے سمیع اسلم کے ساتھ پاکستان کی پہلی اننگز کا کھیل شروع کیا۔ حفیظ پہلے ہی اوور میں بغیر کوئی رن بنائے جیمز اینڈرسن کی گیند پر کیچ آؤٹ ہوگئے۔
پاکستان انگلینڈ کے خلاف تیسرا ٹیسٹ میچ کھیل رہا ہے اور حفیظ اب تک کوئی بڑی اننگز نہیں کھیل پائے۔
اس موقع پر سمیع اسلم کا ساتھ دینے اظہر علی آئے۔ دونوں نے 181 رنز کی عمدہ پارٹنر شپ سے میچ پر پاکستان کی گرفت مضبوط بنائی۔
سمیع اسلم نے کیرئیر کی پہلی نصف سنچری سکور کی اور 82 رنز بناکر رن آؤٹ ہوگئے۔
اظہر علی دن کے اختتام تک بیٹنگ کرتے رہے۔ انہوں نے دو سو نو گیندوں پر دس چوکوں اور ایک چھکے کی مدد سے اپنی دسویں سنچری مکمل کی۔
اظہر علی نے سنچری سکور کرنے پر پش اپ لگائے اور سیلیوٹ بھی کیا۔
میچ کے دوران جو روٹ نے اظہر علی کا کیچ بھی ڈراپ کیا جو انگلینڈ کے لیے کافی مہنگا ثابت ہوا۔
اظہر علی دن کی آخری گیند پر 139 رنز بناکر کیچ آؤٹ ہوگئے۔ ووکس نے ان کی وکٹ حاصل کی۔
یونس خان 21 رنز پر ناٹ آؤٹ ہیں۔ انگلینڈ کی جانب سے جیمز اینڈرسن اور کرس ووکس نے ایک ایک وکٹ حاصل کی۔
